Lle dechreuodd y cyfan!

Yn 2021 bûm yn gweithio ar brosiect cydweithredol ymchwil a datblygu rhyngwladol Eye See Ai gyda chwmni theatr Hijinx a’r Mat Tran Ensemble a Tohe Fun yn Fietnam. Fe wnaethom greu perfformiadau byr yng Nghymru ar gyfer lleoliadau penodol yn Hanoi gan ddefnyddio technoleg realiti estynedig, byddai'r gynulleidfa wedyn yn gallu gweld y perfformiadau yn y lleoliadau ar ffon symudol. Yn yr un modd crëwyd gwaith yn Hanoi ar gyfer lleoliadau penodol yng Nghaerdydd, Cymru.

Roedd y broses gyfan yn hynod ddiddorol, yn enwedig y dechnoleg, dechreuais feddwl am beth allai fod yn gyraeddadwy pe baech chi'n gallu defnyddio'r math yma o dechnoleg ar gyfer perfformiad byw, dyma le dechreuodd y syniad ar gyfer Gorlwyth.

Dechreuodd y broses feddwl a'r cysyniad hefyd yn ystod prosiect Eye See Ai, a daeth y cyfan mewn gwirionedd o un ddelwedd, delwedd o wifrau clymog wedi'u plethu a hongian yn Hanoi. Bydd hyn i gyd yn dod yn glir yn nes ymlaen! Byddaf yn ceisio lleoli'r llun yma hefyd i'w rannu gan iddo danio hyn i gyd.

Y cam nesaf oedd trefnu sgwrs gyda Chyfarwyddwr Celfyddydau Osian Gwynn yn Canolfan Celfyddydau ac Arloesi Pontio, ym Mangor, ‘Mae gen i’r syniad hwn, beth ydych chi’n ei feddwl ac a yw’n rhywbeth y gallai Pontio ei gefnogi?’ fe ges i ymateb hynod gadarnhaol, ac fel artist llawrydd mae cefnogaeth lleoliad fel Pontio yn amhrisiadwy gan ei fod yn golygu y gallwch chi ddod â syniad yn fyw. Nid oes unrhyw ffordd y gallai fod wedi digwydd heb gefnogaeth theatr, yn enwedig gan fod cymaint o dechnoleg yn gysylltiedig, mae'r gofod ei hun yn gynhenid ​​i'r broses. Mewn ffordd mae Gorlwyth yn wrthgyferbyniad llwyr o fy mhrosiect olaf Heb Ffiniau, lle roedden ni ar ein pennau ein hunain yn dawnsio yn y dirwedd, llonyddwch a ffôn ar ochr y mynydd.

Rwyf wrth fy modd bod fy ngwaith mor gyfnewidiol, er efallai bod llawer o gysylltiadau o dan y wyneb rhwng Heb Ffiniau a Gorlwyth. Mae ‘Heb Ffiniau' i fi yn golygu bod unrhyw beth yn bosibl ac ychydig o nod anarchaidd i beidio â chael eich rhoi mewn bocs.

Fedra’ i ddim aros i rannu mwy gyda chi am y prosiect, y broses ymchwil a datblygu, ein tîm anhygoel a’r cam nesaf, dewch draw i edrych ar dudalen Gorlwyth dros yr wythnosau nesaf, a dweud y gwir dwi mor gyffrous am hyn!

Rwy’n hynod ddiolchgar i Ganolfan Celfyddydau Pontio am eu cefnogaeth, ac i dîm tech Pontio am eu holl gymorth, diolch yn fawr!

Diolch hefyd i Cyngor Celfyddydau Cymru am eu cefnogaeth barhaus, ariannwyd y prosiect hwn trwy grant Creu a chyllid y Loteri Genedlaethol.